«Левски» «Қайратты» өтеді»: «Ертістің» бұрынғы қорғаушысы – Чемпиондар лигасының матчы туралы

Павлодарлық «Ертістің» болгариялық бұрынғы қорғаушысы Димитар Наков ASnews.kz басылымына берген сұхбатында Чемпиондар лигасының іріктеу кезеңіндегі алматылық «Қайрат» пен «Левски» арасындағы алдағы текетірес туралы пікірін білдірді.

«Левски» әлі бабына енбеді, ал «Қайрат» қарқын алды

«Қағаз жүзінде «Қайраттың» сәл де болса басымдығы бар деп ойлаймын. «Левски» белгілі себептерге байланысты қазір ең үздік бабында емес: біздің чемпионат жаңа ғана басталды, ойыншыларға бап жетіспейді, ал жаңадан келгендер ұжымға толық сіңісіп үлгерген жоқ.

Мен Қазақстан чемпионатын, әсіресе өзім екі керемет маусым өткізген павлодарлық «Ертісті» бақылап жүремін. Сондықтан «Қайраттың» маусымды сенімсіз бастағанымен, соңғы уақытта тамаша қарқын алғанын білемін. Алматылықтардың жарыстан кипрлік «Омонияны» шығарып тастауы кездейсоқ емес».

Түркістандағы ыстық пен «Левски» жанкүйерлері

«Екінші матчта «Қайрат» қарсыласын Түркістанда қабылдайды, бұл аптап ыстық ауа райы, сөзсіз, «Левски» ойыншыларына әсер етеді. Бірақ болгариялық клубтың өз 12-ойыншысы бар – ол «көктерге» сенімділік пен күш-қуат сыйлайтын жанкүйерлер.

Мен екі кездесудің қорытындысы бойынша «Левски» келесі кезеңге өтеді деп сенемін, әсіресе алғашқы ойында жақсы нәтижеге қол жеткізсе», – деді Наков.

УЕФА Чемпиондар лигасының үшінші іріктеу кезеңі аясындағы «Левски» мен «Қайрат» арасындағы алғашқы матч 4 тамызда Софиядағы «Георги Аспарухов» стадионында өтсе, қарымта кездесу 11 тамызда Түркістанда өтеді.

Болгариялық қорғаушы Димитар Наков 2008 және 2009 жылдардағы маусымда павлодарлық «Ертіс» сапында өнер көрсеткен. Қазақстандық клуб құрамында ол барлық турнирде 58 матч өткізіп, бір голдың авторы атанған.

«Тобыл» Конференция лигасындағы «Партизанға» қарсы матч алдында қиындыққа тап болды: бас бапкердің пікірі