ҚПЛ клубтарының экс-ойыншысы: «Қайрат» «Сутьескадан» мықты, бірақ Черногорияда оңай болмайды

ҚПЛ клубтарының черногориялық экс-жартылай қорғаушысы Горан Милойко ASnews.kz сайтына берген сұхбатында Чемпиондар лигасы аясындағы «Қайрат» пен «Сутьеска» арасындағы кездесуге қатысты ойымен бөлісті.

«Ең алдымен, «Сутьеска» үшін ең үлкен мәселе – Қазақстанға дейінгі ұзақ жол болмақ. Өз басым «Қайраттың» деңгейі әлдеқайда жоғары деп есептеймін, сондықтан өз алаңында оларда ешқандай мәселе туындамауы тиіс.

Алматыдағы лық толы стадионға келсек, иә, «Сутьеска» ойыншылары үшін бұл үйреншікті жағдай емес екені анық, бірақ олар қатты қорқа қоймайды деп ойлаймын. Керісінше, бұл олар үшін Еуропада өзін көрсетудің таптырмас мүмкіндігі. Климатқа келетін болсақ, қазір бізде, Черногорияда да күн қатты ыстық, аптап қарыж жүр. Сондықтан Алматы ауа райына бейімделу оларға қиындық тудырмайды.

«Қайрат» өз үйінде бірнеше гол айырмашылығымен сенімді жеңіске жетуге міндетті. Ал Никшичте оларды сырт алаңдағы өте қиын матч күтіп тұр, әсіресе бірінші ойынның қорытындысы «Сутьескаға» мүмкіндік қалдырса, олар аянып қалмайды. Черногориядағы стадион да лық толы болады деп сенемін», – деді Милойко.

Еске сала кетейік, Чемпиондар лигасының алғашқы іріктеу кезеңі аясында «Қайрат» «Сутьеска» клубына қарсы ойнайды. Рафаэль Уразбахтиннің шәкірттері алғашқы кездесуді 7 немесе 8 шілде күні Алматыда өткізсе, қарымта матч бір аптадан кейін сырт алаңда болады.

32 жастағы тірек жартылай қорғаушысы Горан Милойко ҚПЛ-да 65 матч өткізіп, алты гол соққан және үш нәтижелі пас берген. Ол елімізде қызылордалық «Қайсар» (2023–2024), түркістандық «Тұран» (2025 жылдың бірінші жартысы) және «Атырау» намысын қорғады. Қазіргі уақытта футболшы еркін агент мәртебесінде жүр.