«Молдова арқылы Еуропаға жол ашылады»: қазақстандық қорғаушы «Зимбруға» ауысуы туралы

Қазақстан әйелдер ұлттық құрамасының қорғаушысы Камила Совет ASnews.kz сайтына берген сұхбатында албаниялық «Киностудио» клубындағы ойындары мен молдовалық «Зимбруға» ауысуы туралы айтып берді.

«Қыста мен шетелде ойнау мүмкіндіктерін белсенді түрде іздедім. Маған агент хабарласып, «Киностудио» нұсқасын ұсынды. Ол кезде бұл шетелден түскен жалғыз нақты ұсыныс еді. Қазақстан мен Албания чемпионаттарын салыстыратын болсақ, айырмашылық ең алдымен ойын стилінде жатыр. Қазақстанда мен жүйелі футболға үйреніп қалғанмын, ал Албанияда көп нәрсе нақты клубқа байланысты. Ол жақта мені қатты таңғалдырған дүние болды деп айта алмаймын», – деді Совет.

Биылғы жылдың маусым айында қорғаушы мансабында жоғарылап, еурокубоктарға қатысатын молдовалық «Зимбрумен» келісімшартқа отырды.

«Зимбруға» ауысуды өте дұрыс қадам деп санаймын. Мен үшін бұл жаңа чемпионат, тың тәжірибе және әрі қарай дамуға мүмкіндік. Клубтың еурокубоктарға қатысуы да өте маңызды. Әрине, мен бұл кезеңді даму мүмкіндігі ретінде қабылдаймын және алған тәжірибемді әрі қарай жылжу үшін пайдаланғым келеді. Басты мақсатым – болашақта Батыс Еуропа елдерінің бірінің чемпионатына ауысып, өз күшімді мүлдем жаңа деңгейде сынап көру», – деп түйіндеді 22 жастағы футболшы.

Айта кетейік, Еуропаға ауысқанға дейін Камила Совет өз елінде елордалық №8 БЖСМ, «Томирис-Тұран», шымкенттік «БИІК», «Ордабасы» және «Ұлытау» командаларының намысын қорғады. 2023 жылы қорғаушы ыстанбұлдық «Галатасарайдың» қаралымында болды, ал сол жылдың желтоқсан айында Қазақстан ұлттық құрамасы сапындағы алғашқы ойынын өткізді.

«Жер сілкінісі «Галатасарайға» ауысуыма кедергі болды». Қазақстандық футболшы Еуропадағы мансабын қалай құрып жатыр?