АПЛ-дың экс-шабуылшысы: Сәтпаев жалға берілмей, «Челсиде» қалуы керек

АПЛ-дың бұрынғы шабуылшысы Нейтан Блэйк ASnews.kz басылымына берген сұхбатында «Челсидің» қазақстандық жас таланты Дастан Сәтпаевтың ойыны мен лондондық клубтағы келешегін бағалады.

«Агуэроға ұқсайды және денесі шыныққан»

«Сәтпаевтың «Вестерн Сидней Уондерерске» соққан голын көріп, сүйсіндім. Бұл өте шебер орындалған гол болды. Ұлттық құрамаларымыз кездескенде, Кардифф пен Астанадағы ойындарын көріп-ақ бұл жігіттің ойыны ұнағанын бұған дейін де айтқан едім. Ол маған Агуэроны қатты еске түсіреді деп те айттым. Қыркүйектен бері денесі де шынығып, өсіпті».

«Челсидегі» үшінші шабуылшы рөлі

«Оның «Челсидегі» болашағы туралы айтар болсақ, қазіргі уақытта оны команданың үшінші шабуылшысы ретінде көремін. Бұл шепте біріншісі – Жоао Педро, екіншісі – Дэнни Уэлбек екені анық. Педро – тым кәрі де, тым жас та емес, өте тұрақты шабуылшы. Уэлбек – тәжірибесі мол форвард. Осы дуэттің қасына серпін бере алатын әрі осы екеуінен үйрене алатын жас ойыншы керек», – дейді Блэйк.

Жалға кеткеннен көрі, клубта қалған тиімді

«Құрамда Дастан сияқты жастар болғанда, тіпті аз ойын уақытын алса да, оларды клубта ұстаған дұрыс. Ары-бері жалға берілгеннен көрі, клубта қалып, жігіттермен араласу, олардың қалжыңдарын, күнделікті әңгімелерін естіп жүру арқылы бейімделу және команданың бір бөлігіне айналу әлдеқайда оңайрақ. Егер ол клубта қалса, Англия Лига кубогында (EFL Cup) міндетті түрде мүмкіндік алады деп ойлаймын.

Хеннинг Берг «тіпті аз уақыт берілсе де, бұл пайдалы» деп айтқанда өте дұрыс айтты. Мен Бергпен бірге ойнағанмын, оны жақсы танимын, жақсы жігіт қой (күледі). Сәтпаев Англияға жаңадан келді, әрине, бұл оңай емес. Сондықтан ол клубта қалып, жақсылап бейімделуі керек.

Бірақ егер «Челси» оны жалға беруді ұйғарса, оны өзімнің туған клубым «Кардифф Ситиде» көруге қуанышты болар едім (күледі)», – деп тәмәмдады Блэйк

17 жастағы Қазақстан құрамасының шабуылшысы Дастан Сәтпаев 2026 жылдың жазында лондондық «Челсиге» ауысты. 28 шілдеде ол аустралиялық «Вестерн Сидней Уондерерске» қарсы жолдастық кездесуде негізгі құрамда дебют жасап, 6-минутта-ақ алғашқы голын соқты. Қазақстандық футболшының голы түсірілген видео лондондықтардың әлеуметтік желілерінде миллиондаған қаралым жинап, вирусты таралды.

Нейтан Блэйк клубтық деңгейде 450-ден астам матч өткізіп, 140-тан астам гол соққан. Англия Премьер-лигасында ол «Болтон», «Блэкберн», «Вулверхэмптон» және «Лестер» сапында өнер көрсетті. Уэльс ұлттық құрамасы сапында шабуылшы 30 ойын өткізіп, төрт голымен көзге түскен. Мансабын аяқтаған соң Блэйк уэльстік БАҚ-та сарапшы әрі комментатор болып жұмыс істейді.

Бұған дейін «Манчестер Юнайтедпен» АПЛ, Чемпиондар лигасы мен Англия кубогын ұтқан Хеннинг Берг Дастанның «Челсидегі» болашағы жайлы пікір білдірді.