Нұрдәулетов – «Қайсардан» түскен ұсыныс жайлы: батып бара жатқан қайықта соңына дейін боламын

Талдықорғандық «Жетісудың» бас бапкері Қайрат Нұрдәулетов ASnews.kz сайтына берген сұхбатында ҚПЛ-дың 28-туры аясында өткен «Қайратқа» қарсы ойын (0:1) жайлы пікір білдірді.

– Алдымызға қойған мақсатымызға жетпедік. Алаңға жеңілмейміз деп шыққанбыз, өзіміздің тактикамыз бен ойын жүйеміз болды. Жігіттерге ризалығымды білдірдім, олар жүз пайыздан артық күш жұмсады. Сәттілік жетіспеген шығар. Асхаттың баспен ұрған добы кіргенде, бәрі басқаша болар еді. «Қайрат» командасына сәттілік тілеймін. Бізге ұпай ауадай қажет, сондықтан берілмейміз және соңына дейін күресеміз.

– Командада ойыншыларға жалақы төленбей, наразылық туындап жатқанда оларды дайындау қаншалықты қиын болды?

– Әрине, өте қиын. Менде сылтау іздейтін әдет жоқ, бірақ бұл жігіттердің психологиясына қатты әсер етеді. Үйде әйелі ренжіп, бала-шағасы аш отырғанда, ойыншы қалай жаттығады? Осыған қарамастан жұмыс істеп, бүгін алаңға шыққан жігіттерге көп рақмет. Футболда өзіңді емес, бойыңдағы футболды жақсы көру керек. Олар футболды шын жақсы көреді.

– Биыл сізді «Қайсар» шақырды, былтыр «Ордабасы» мен «Тобылдан» қызығушылық болды. Неге Қызылордаға бармадыңыз? Басшылық жібермеді ме?

– Басшылық жібермеді емес. Мен бұл командаға келіп, жігіттерді жинағаннан кейін, оларды тастап қашып кету маған жат. Мені олай тәрбиелемеген. Суға батып бара жатқан кемеден тек егеуқұйрықтар қашады. Біз бұл қайықта соңына дейін боламыз. Бәлкім, маңдайымызға жазылғаны осы шығар.

Алаң қожайындары басымдыққа ие болғанымен, қауіпті сәттер аз болды. Ойын тағдырын 86-минутта Марк Гуаль соққан жалғыз гол шешті. Бұл жеңістен кейін алматылық клуб 60 ұпай жинап, көшбасшы «Ордабасыдан» небәрі бір ұпайға қалып келеді (шымкенттіктердің еншісінде бір ойын бар). Ал «Жетісу» 23 ұпаймен турнирлік кестенің соңғы сатысында қалды.