«Ордабасы» ойыншысы Жасұлан Әмір ағылшын тілін үйреніп жүргенін айтты және трансферлік сыбыстарға жауап берді

«Ордабасы» мен Қазақстан ұлттық құрамасының 19 жастағы жартылай қорғаушысы Жасұлан Әмір мансабын Еуропада жалғастыру жоспарлары, ағылшын тілін меңгеруі және осы маусымдағы мақсаттары туралы айтты, деп хабарлайды ASnews.kz.

«Бұйырса осы маусымды «Ордабасыда» бітіріп, ары қарай қалай болатынын көреміз. Ештеңе әлі шешілмеді. Ұсыныстар келіп жатқанынан хабарым жоқ (күледі). Еуропада ойнау – менің арманым. Құдай қаласа, кейін көресіздер. Бір айдай болды, ағылшын тілін үйреніп жатырмын, өйткені болашақта Еуропада ойнауға тіл керек болады. Сөйлесу мен даму үшін ағылшын қажет, әрине. Қазіргі мақсат – чемпионатта да, Кубокта да бас жүлдені ұту.

Ұлттық құраманың кеңейтілген тізімі шықты, енді Құдай қаласа мақсатым – нақты тізімге іліну. Ұлттар лигасына келетін болсақ, Фарер аралдары, Словакия мен Молдова – өте жақсы қарсыластар. Бар күшімізді саламыз, егер де шақырту алсам (күледі)», – деді жас футболшы.

«Ордабасы» Қазақстан gремьер-лигасының жарыс кестесінде көш бастап тұр. Сонымен қатар шымкенттік клуб Қазақстан Кубогының финалына шықты, онда бас жүлде үшін қызылордалық «Қайсармен» кездеседі.

Бұған дейін ASnews.kz хабарлағандай, бельгиялық «Зюлте-Варегем» 19 жастағы жартылай қорғаушы үшін 500 мың еуро ұсынған болатын. Сондай-ақ ойыншыға Калининградтың «Балтикасы» мен MLS-тің «Нью-Йорк Ред Буллз» клубы тарапынан қызығушылық болды. Алайда «Ордабасы» басшылығы чемпиондық жарыстың шешуші кезеңі алдында құрамды әлсіретпеу үшін Әмірді маусым соңына дейін командада алып қалуды жөн көрді.

Ағымдағы маусымда Жасұлан Әмір шымкенттіктер сапында барлық турнирлерде 27 матч өткізіп, 10 гол соқты және жеті нәтижелі пас берді.

Сәтпаевқа еріп Еуропаға кете ме? ҚПЛ-2026 маусымының басты таланты Жасұлан Әмір жайлы не білеміз?