Бельгиялық сарапшы: Гонсалвес «Ақтөбеге» көмектеседі, ол проблемалы футболшы емес

HLN басылымының бельгиялық сарапшысы әрі журналисі Ян Ван Лейсебет ASnews.kz сайтына берген сұхбатында «Ақтөбеге» ауысуы мүмкін футболшы Брайан Гонсалвестің шеберлігін бағалады.

«Ең алдымен айта кету керек, Гонсалвес проблемалы футболшылардың қатарына жатпайды. Ол – ашық-жарқын, көпшіл адам. Ойыншы ретіндегі қасиеттеріне келсек, баспен жақсы ойнайды, жекпе-жектерде жақсы күреседі, позицияны дұрыс таңдай біледі. Соққысы да жақсы қойылған: айып соққыларын да, бұрыштамаларды да орындай алады.

Екінші жағынан, Брайанға маневр жасау мен жылдамдық жетіспейді. Дегенмен бұл кемшіліктерін ойын арқылы толықтыруға болады», – деді Ван Лейсебет.

Жергілікті БАҚ мәліметінше, 29 жастағы «Дендер» клубының орталық қорғаушысы Брайан Гонсалвес «Ақтөбеге» ауысуға жақын. Ағымдағы маусымда француз футболшысы Бельгия чемпионатында 20 матч өткізіп, 2 нәтижелі пас берген.

ПСЖ тәрбиеленушісі 7-нөмірмен өнер көрсетеді және стандартты жағдайларды жиі орындайды. Сонымен қатар, қажет болған жағдайда қорғаныстың сол қапталында да ойнай алады.