«Каспий» ФК: клубтың төрт айлық қарызы жоқ

Ақтаулық «Каспий» клубы бұқаралық ақпарат құралдарында футбол орталығының жаттықтырушыларына төрт ай бойы жалақы бермеді деген ақпаратқа жауап берді, деп хабарлайды ASnews.kz.

«Ресми түрде мәлімдейміз, футбол орталығының жаттықтырушылары алдындағы жалақы қарызы екі айды құрайды. Қаражат облыстық спорт басқармасының шотына түсті, енді қызметкерлерге толық көлемде беріледі.

Турнирлерге қатысу мәселесіне келсек, жастар және әйелдер командалары жаңа маусымға дайындық аясында оқу-жаттығу жиындарын өткізіп жатыр. Клуб өз тәрбиеленушілерін Қазақстан футбол федерациясының ұйымдастыруымен өтетін барлық жарыстарға тұрақты түрде жіберуде.

Алдағы уақытта тек клубтың ресми мәліметтеріне сенулеріңізді сұраймыз», – деп мәлімдеді «Каспий» өкілдері.

Жаңа маусымда «Каспийдің» негізгі командасы қайтадан Премьер-лигада өнер көрсетуде. Үшінші турда ақтаулықтар «Алтаймен» кездеседі.