Джеффри Чинеду – РПЛ-дың деңгейі туралы: Ресей Қазақстаннан алда

«Крылья Советов» клубының шабуылшысы Джеффри Чинеду ASnews.kz сайтына берген сұхбатында Ресей мен Қазақстан чемпионаттарының деңгейін салыстырды.

Былтыр «Астана» сапында ойнаған футболшы «Динамо Махачкала» қақпасына екі гол соғып, командасының 2:0 есебімен жеңуіне көмектесті.

«Ресейде ойнау Қазақстанға қарағанда қиынырақ. Бір кездері Ресей Премьер-лигасы әлемдегі ең мықты жеті чемпионаттың қатарына кіретін.

Бүгін ауа-райы өте суық болды: бетім де, қолым да мүлдем сезілмей қалды. Соңғы рет Алматыда дәл осындай суық ауа-райында ойнаған едім, ол кезде «Астана» «Челсиді» қабылдап, матч 1:3 есебімен аяқталды. Бақытымызға қарай, бұл жолы бутсының астына қосымша жабдық киюдің қажеті болмады», – деді Чинеду.

Ресейлік клуб нигериялық шабуылшыны «Астанадан» 330 мың еуроға сатып алды. 28 жастағы ойыншы Қазақстан Премьер-лигасында 36 матч өткізіп, 18 гол соқты, 3 нәтижелі пас берді.