Бага – «Ұлытаумен» өткен матч туралы: қазақстандық клуб жағымды әсер қалдырды

Ресейлік «Ленинградец» клубының бас бапкері Алексей Бага ASnews.kz сайтына берген сұхбатында «Ұлытауға» қарсы өткен жолдастық матчты (1:1) қорытындылады.

«Улытаумен» өткен ойын біз үшін өте пайдалы болды. Оқу-жаттығу жиынын лайықты қарсыласпен аяқтап, 90 минут ойнау біз үшін маңызды еді. Бұл команда маған жағымды әсер қалдырды: өзара үйлесім бар, жеке шеберліктері де байқалды.

Дайындықтың 30-шы күні болғанына қарамастан, ойын қарқынды өтті. «Ұлытауға» сәттілік тілеймін, қазақстандықтардың жолы болсын. Алдағы КПЛ маусымы тартысты әрі қызықты болайын деп тұр, себебі барлық командалар жақсы күшейіп жатыр», – деді Бага.

Түркияда өткен бақылау ойыны тең нәтижемен аяқталды. Жезқазғандық клуб сапында 26 жастағы шабуылшы Вадим Афанасенко гол соқты. Ол бұған дейін «Атырау» клубында өнер көрсеткен.

Алексей Бага «Ленинградец» командасын өткен жылдың жазынан бері жаттықтырып келеді. 2021 жылы Беларусь маманы «Ақтөбе» клубының тізгінін ұстаған еді.