«Ойыншыларымызға қызығушылық бар»: Ромащенко «Партизан», «Тобылдың» мақсаттары мен Чесноков туралы

«Тобылдың» бас бапкері Мирослав Ромащенко ASnews.kz сайтына берген сұхбатында Конференция лигасының үшінші іріктеу кезеңіндегі «Партизанға» қарсы қарымта кездесуден (1:2) кейін көкейкесті сұрақтарға жауап берді.

Қостанайлықтар күтпеген жерден алаңға бірден екі ірі шабуылшыны шығарды: Милованович пен Лисакович.

«Маусымда алғаш рет қарсыласқа осылай қысым жасау мүмкіндігі туды. Екі форвардпен ойнап, оларды ынғайсыз жағдайға қалдыруға тырыстық. Оқу-жаттығу процесін өткізбей, нәтижеге үміт арту қиын екені түсінікті, бірақ жігіттердің қысқа мерзімде шабуыл ұйымдастыруды үйренетін қауқары бар.

Алғашқы таймда шабуылдағы төрттік жақсы әрекет етті. Жалпы, олардың жұмысына көңілім толады, бірақ 4-2-4 схемасы бойынша сапалы өнер көрсету үшін командаға сәл көбірек уақыт керек.

Допсыз әрекет ету? «Партизанға» қарсы алғашқы кездесуде (0:3) біз басқа құрамды пайдаландық, бірақ ұстанымдар өзгеріссіз қалды. Прессинг, қапталдағы ойын, кері пас – бәрі орындалды. Қарсылас өзінің мықты тұстары арқылы бізді тығырыққа тіреген сәттері болмады.

Мұндай жұмыс үшін физикалық дайындық қажет. Виталий (Лисакович) командаға жаңадан қосылды және осы кезеңде бар күшін салды. Соңғы минуттарда бәрінің шаршағаны байқалды – бұл тек бір ойыншыға емес, бүкіл ұжымға қатысты. Алғашқы ретке – жаман емес», – дейді Ромащенко.

«Тобыл» ҚПЛ-да да осы тактиканы қолдана ма?

«Матчтар екі күн, үш күн, төрт күн сайын өтетін тығыз кестедеміз. Мұндай қиын графикте тепе-теңдікті сақтау үшін функционалдық дайындық керек. Ал ол базаны қалыптастыру үшін артқа қарап, онымен айналысуға мүмкіндік болды ма деген сұраққа жауап іздеу қажет.

Матч барысында ойыншылардың байланысы мен ойын схемасын өзгертуге мәжбүрміз, сондықтан көре жатармыз. Қазіргі жағдай мен қарсыластың ойынына сүйенеміз, бірақ құрамыңда мұндай орындаушылар болғанда, олардың алаңға жиі шыққаны маңызды».

Соңғы фазада батылдық пайда болды ма, әлде шабуылшылар әлі де жауапкершілікті өз мойнына алудан қорқа ма?

«Кездесудің бірінші жартысында бұл жағы бұрынғыға қарағанда жақсырақ болды: нақтылық пен мақсаттылық байқалды. Ешкім соңғы әрекетке асыққан жоқ – бұл жерде (Луис) Герраның пасын атап өткен жөн. Бұрын асығып, шыны керек, доптан құтылуға тырысатын едік, ал бүгін мен айырмашылықты және жігіттердің барын салуға деген ұмтылысын көрдім».

Клуб барлық турнирден шығып қалды: әрі қарай не болады?

«Маусымның басынан бері қалай ойнап жатқанымызды өзіңіз де көріп отырсыз. Енді чемпионат матчтарына назар аударып, турнирлік кестеде жоғарылап, оң нәтижеге қол жеткізу үшін бар күшімізді салуымыз керек».

Үзілісте, егер еурокубокте сәтсіздікке ұшыраса, вингерлердің бірі «Тобылдан» кетуі мүмкін деген ақпарат пайда болды. Бұл шындыққа қаншалықты жақын?

«Басшылықпен әлі сөйлескен жоқпын. Былай жауап берейін: бірқатар ойыншылар бойынша сұраныстар бар, олар басқа лигаларға ауысуы мүмкін. Әзірге нақты ақпаратым жоқ – күні бойы телефоным өшірулі болды. Бұл мәселені ертең футболшылармен талқылаймыз», – деді 52 жастағы беларусьтік маман.

Екі кездесудің қорытындысы бойынша «Тобыл» «Партизанға» 1:5 есебімен жол берді. Конференция лигасының плей-офф кезеңінде сербиялық клуб өткен маусымда Ла Лигада жетінші орын алған испаниялық «Хетафемен» кездеседі.

Ресейлік БАҚ ақпаратынша, Милош Крунич қақпасына соғылған жалғыз голдың авторы Ислам Чесноков «Крылья Советов» клубына ауысуы мүмкін. Шабуылшы маусым айында «Хартстан» қайта сатып алынған болатын.

«Партизан» бапкері «Тобылдың» қысымын бағалады: олармен психологиялық тұрғыда қиын болды