Ат спорты: «Ел Орда» Алматыдағы бәйге маусымының жабылуында ҚР Президентінің жүлдесін жеңіп алды

Алматы ипподромында тегіс бәйге маусымы мәресіне жетті. Соңғы жарыс күні жалпы жүлде қоры 64 млн теңгені құрайтын жеті шабыс өтті.

Бағдарламаның басты оқиғасы – жүлде қоры 20 млн теңгені құрайтын 2400 метр қашықтықтағы ҚР Президенті жүлдесінің сарапқа салынуы болды. Бәйгеде Диас Жеңіс тақымдаған астаналық бес жасар «Ел Орда» атты айғыр топ жарды. Ол қашықтықты 2 минут 32,55 секундта жүріп өтіп, Балобан мен Фантастик Куолитиді артта қалдырды. Тұлпардың бапкері – Эдуард Ахмолдин, ал иесі – Ұлан Умаров (жеңіс иесіне 10 млн теңге жүлде әкелді).

Жүлде қоры дәл осындай Qazaqstan Breeders’ Cup бәйгесінде (Орталық Азия тұқымды сәйгүліктер үшін) Рамазан Табылдиев тізгіндеген үш жасар Ресми есімді бие бірінші болып мәре сызығын кесті. Ол 2400 метрді 2 минут 41,09 секундта басып өтті. Бір күнде екі жеңіске жеткен жокейлер – Хәкімбек Қожақов (Джейн Уиннер мен Каххаарда) және Әсет Бекжанов (Фрости Бой мен Адиятта) болды.

Juvenile сериясындағы екі жасар сәйгүліктер жарысының үздік қатысушылары 2026–2027 жылдардағы қысқы маусымда БАӘ-де халықаралық деңгейдегі өнерлерін жалғастыруы мүмкін.

Qazaq Jockey Club атқарушы директоры Талғат Жайсаңбаев ипподромның болашақ келешегін бағалады:

«Мұндай бәйге күнін өткізу Алматы ипподромының әкімдік меншігіне қайтарылуы және ат спорты шаралары үшін қайта ашылуы арқасында мүмкін болды. Қазақстан Президентінің тапсырмасы бойынша ипподромды реконструкциялау және оны халықаралық стандарттарға сәйкестендіру жоспарлануда. Бұл елдегі классикалық бәйгенің дамуына үлкен серпін береді», – деді Жайсаңбаев.

Айта кетейік, соңғы үш жылда Алматыдағы бәйге маусымының жабылу жүлде қоры 25-тен 64 млн теңгеге дейін өсті. Ал жарыстың басты жүлдесі – ҚР Президентінің жүлдесі отандық ат спортында 1997 жылдан бері үзіліссіз сарапқа салынып келеді.