«Адам болу керек»: журналист Азия ойындарында Головкинге қатаң жауап қайтарды

Қазақстандық журналист Аслан Қаженов Жапонияның Нагоя қаласында өтіп жатқан ХХ жазғы Азия ойындарындағы келеңсіз оқиғадан кейін ҚР Ұлттық олимпиада комитеті мен World Boxing ұйымының президенті Геннадий Головкинді қатаң сынға алды, деп хабарлайды ASnews.kz.

Журналист әлеуметтік желідегі парақшасында даңқты боксшымен болған жанжал туралы айтып, ҰОК басшысын турнирде даулы шешімдерге тап болған қазақстандық спортшылардың мүддесін қорғауға назар аударуға шақырды.

«Ашуын менен алды!

Бұған дейін Геннадий Головкин туралы бір негатив жазбадым. Керісінше, құрметім ерекше болатын. Бүгін нөлге түсті. Бокс сессиясынан кейін амандасып жатсам, «бесстыйжый» (ұятсыз – еск.) дейді. Даңқты чемпион шығарсың. Бірақ, адам болып қалу керек. Біз бұнда жүрген қаямбас емеспіз. Бір елдің атынан келген соң, сол елдің мүддесі үшін күйіп-пісіп, сол елдің спортшылармен бірге қуанып, бірге мұңайып жүрген бір қазақтың баласымын.

Бізде де намыс бар. Бізде де арын бар. Шындықты айттым. Шындықты айтамын. Көтіңе кірмеймін. Саған мен туралы кім не дегенін білмеймін. Өсек-аяңға ере бермей, нақты жұмыспен айналыс!

Викторияның жеңісін қайтар! Ясминаның «алтынын» қайтар! Басқа да жұмыс жетеді. Өз еліңнен келген қаракөздерге сөзбен атылып, олай мұқата берме! Нақты іспен айналыс!», – деп жазды Қаженов.

Еске сала кетейік, Геннадий Головкин Нагоядағы Азия ойындарына 21 қыркүйекте барған болатын. Қазіргі уақытқа дейін бокстан Қазақстан құрамасы бірқатар ауыр шығынға ұшырады: Сабыржан Аққалықов, Оразбек Асылқұлов, әлем чемпионы Нұрбек Оралбай, сондай-ақ әйелдер құрамасының өкілдері Назым Қызайбай, Виктория Графеева мен Аида Әбікеева турнирді мерзімінен бұрын аяқтады.

Журналист өзінің эмоционалды жазбасында Қазақстанды медальдардан қаққан биылғы Азия ойындарының екі үлкен дауына тоқталып өтті:

1/8 финалда қазақстандық Виктория Графеева төрешілердің екіұдай шешімімен (2:3) Олимпиада чемпионы Линь Юйтинге (Тайвань) жол берді. Бірінші раундта Графеева 4:1 есебімен басым түскен, алайда екінші раундта спортшымыздың дәл соққыларына қарамастан, үш төреші тең нәтиже тіркеп, жалпы басымдықты қарсыласқа берді. Қазақстандық сарапшылар бұл шешімді «тонау» деп бағалады.

Жеңіл атлет Ясмина Тоқсанбаева марафондық спорттық жүрісте Азия рекордымен (3:22:20) мәреге бірінші болып жетті. Алайда мәре сызығын кескеннен кейін қарсыластарының шағымына байланысты қазақстандық спортшы шеттетіліп, медалінен айырылды. Оның кроссовкасының үлгісі (ASICS) World Athletics рұқсат еткен аяқ киімдердің жаңартылған тізімінде жоқ болып шықты. Дегенмен, жарыс алдында оның спорттық киімі ресми тексерістен өткен болатын. ҚР Жеңіл атлетика федерациясы апелляция берді.

Айта кетейік, 2026 жылдың тамыз айында Геннадий Головкин украиналық «Миротворец» сайтының дерекқорына енгізілген болатын. Бұған 2026 жылдың шілдесінде Головкиннің басшылығымен World Boxing ұйымының ресейлік және беларусьтік боксшылардан шектеулерді алып тастап, оларға халықаралық жарыстарда өздерінің ұлттық рәміздерімен (туы мен әнұранын қоса алғанда) өнер көрсетуге рұқсат беру туралы шешімі себеп болды. Аталған сайтта спортшыларға қатысты осы шешімі үшін функционерді «Ресей агрессиясын ашық қолдады» деп айыптады.