«Бұл ақымақтық болды»: Нұртас Адамбай футбол туралы айтқан сөздерінен қателескенін мойындады

Белгілі қазақстандық актер, режиссер әрі продюсер Нұртас Адамбай деректі кино режиссері Қана Бейсекеевке берген сұхбатында футбол туралы бұған дейін айтқан даулы мәлімдемелеріне қатысты пікір білдірді. Киногер қазақстандықтарды спорттың бұл түрінен бас тартуға шақырғанда қателескенін мойындады, деп хабарлайды ASnews.kz.

Сұхбаттасушының «сіздің үзілді-кесілді мінез-құлқыңыз адамдарды діннен алшақтатып жібермеді ме?» деген сұрағына жауап бере отырып, Адамбай радикалды терминдерді қолданғанын жоққа шығарды, бірақ өзінің қателігін толықтай түсінді:

«Мен «харам» деген сөзді айтқан жоқпын. Бұл сөздерді маған теліп қойды. Футболмен айналысудың және оны көрудің қажеті жоқ деп айтқанымда қателескенімді мойындаймын. Бұл нағыз ақымақтығым еді. Сол кезде ақымақ болғаным сонша, біреуге немен айналысып, немен айналыспау керектігін айтуға құқығым бар деп санаппын. Мен «харам» сөзін қолданған жоқпын, өйткені менде мұндай құқық жоқ және Құдайға шүкір, олай деген жоқпын. Кейін біреулер менің сөздерімді бұрмалап жіберді».

Өз сөздерінің қоғамның дінге деген көзқарасына ықтимал кері әсері туралы айта келе, продюсер қатты өкінетінін білдірді:

«Мен біреуді діннен алшақтатқан болуым мүмкін бе? Мүмкін, менің кесірімнен біреу дін туралы теріс ойда қалған да болар. Осындай жағдай болуы мүмкін деген қорқыныш бар. Менің кесірімнен біреудің дін туралы теріс ойлағанын қаламас едім. Бұған менің қатысым болуы мүмкін дегенді ойлаудың өзі жағымсыз. Ең ауыры – егер адам бұл жолды таба алмаса».

Еске сала кетейік, бұған дейін Нұртас Адамбай ең танымал спорт түрін қатаң сынға алған болатын. Ол мұсылман елдерінің футболшылары әуретін (жабуға бұйырылған дене мүшесі) көрсетіп, қысқа шортымен ойнауға мәжбүр екенін, бұл діни қағидаларға қайшы келетінін мәлімдеген еді.

Сонымен қатар, режиссер футболды орны толмас байлық – уақытты босқа құрту деп атаған.

«Бұл уақытты Алла бізге игі істер жасау, дұға ету, отбасымызды адал жолмен асырау үшін берді деп ойлаймын», – деген еді сол кезде Адамбай.

Жанкүйерлер де сынға ілікті: жанкүйердің әлемдік деңгейдегі футболшының алдында тізерлеп тұрған видеосын көрген продюсер адамды бұлайша ұлықтауды айыптауға шақырған болатын.

Спорт тақырыбынан бөлек, Адамбай ЛГБТ насихаты үшін Қазақстанда бірқатар фильмдердің көрсетіліміне тыйым салу туралы ашық үндеулерімен де есте қалды. Сонымен бірге режиссер өзі әйел адамның рөлін сомдаған «Келінка Сабина» жобасын қорғап, ондағы рөлі әуел бастан әйел рөлі екенін және оның ешқандай насихатқа жатпайтынын алға тартқан болатын.