Екі қазақ Қытай құрамасы сапында 2026 жылғы Азия ойындарында өнер көрсетеді

Шыңжаңнан шыққан қандастарымыз – боксшы Данабек Байқоныс пен еркін күрес шебері Айдос Қадыр – Жапонияда өтетін 2026 жылғы ХХ жазғы Азия ойындарында Қытай құрамасы сапына енді, деп хабарлайды ASnews.kz.

Екі спортшы да ҚХР Шынжаң-Ұйғыр автономиялық ауданының Тарбағатай аймағында туған және ұлттық әрі халықаралық аренада елеулі табыстарға жеткен:

Данабек Байқоныс (бокс, 92 кг-дан жоғары салмақ дәрежесі) – аса ауыр салмақта өнер көрсетеді. Оның еншісінде Ханчжоудағы Азия ойындарының (2023) және 2025 жылғы әлем чемпионатының қола медальдары, 2025 жылғы ҚХР-дың 15-ші Ұлттық ойындарының алтын жүлдесі, сондай-ақ 2026 жылдың мамыр айында өткен Қытай чемпионатындағы жеңісі бар.

Айдос Қадыр (еркін күрес, 86 кг-ға дейінгі салмақ дәрежесі) – Дөрбілжің ауданынан шыққан балуан. Спортшы жастар арасындағы Қытай чемпионы (U-23) атанған, Қытайдың 15-ші Ұлттық ойындарының қола жүлдесін (2025) иеленген және әлем чемпионатына қатысу үшін ҚХР ұлттық құрамасының сапына тартылған.

ХХ жазғы Азия ойындары 2026 жылдың 19 қыркүйегі мен 4 қазаны аралығында Жапонияның Аити префектурасы мен Нагоя қаласында өтеді. Жарыс 43 спорт түрін қамтиды, онда 469 медаль жиынтығы сарапқа салынады.

ШҰАР-дың солтүстік-батысындағы Тарбағатай аймағы Қытайдағы қазақ диаспорасы тығыз қоныстанған тарихи өңірлердің бірі болып табылады. Бұл өңір ҚХР-дың жекпе-жек және қысқы спорт түрлері бойынша құрамаларына спортшыларды тұрақты түрде баптап қосып келеді.