Олимпиада чемпионы Данияр Елеусінов Назарбаев туралы даулы жазбасын өшіріп тастады

Рио-де-Жанейродағы 2016 жылғы Олимпиада ойындарының чемпионы Данияр Елеусінов әлеуметтік желіде Қазақстанның саяси жүйесі мен геосаяси жағдайына қатысты шулы мәлімдеме жасап, кейін оны өшіріп тастады, деп хабарлайды ASnews.kz.

Өз жазбасында боксшы бұрынғы билікті қолдайтынын және елдің геосаяси жағдайы туралы ойын білдірді (автордың стилі сақталған, орфография түзелген):

«Мен Назарбаевтің жүйесін қолдаймын. Тоқаев сол атымның жалғасы.Бізде басқа таңдау жоқ. Себебі орыстар бізді аңдыйды. Қытайлар сүрінсек қуанады… Одан да үндемей бейтарап көтті қысып отырғанымыз абзал… Соғыс жоқ, басымыз аман бірақ тәуелді болып отыра берейік… Армия жоқ… Атомдық қару жоқ...Енді не істейміз??? Осылай отырамыз ең болмаса тыныш болсын деп», – деп жазды спортшы.

Біраз уақыттан кейін спортшы бұл жазбаны өз парақшасынан өшіріп тастады. Боксшы мұндай шешімнің себебін әлі түсіндірген жоқ.

Данияр Елеусінов – Рио-де-Жанейродағы 2016 жылғы Олимпиада ойындарының чемпионы, әлем чемпионы (2013) және Азия ойындарының екі дүркін жеңімпазы.

Кәсіпқой бокста қазақстандық спортшы жартылай орта салмақта өнер көрсетеді және бұған дейін IBO тұжырымы бойынша әлем чемпионы белбеуіне иелік еткен.