Глеб Макридов: «Атлетикоға» келгеніме қуаныштымын – мұнда әлемнің үздіктері доп тебеді

Қарағандылық «Шахтердың» шабуылшысы әрі өткен маусымда QJ League-тің ең үздік ойыншысы атанған Глеб Макридов ASnews.kz сайтына берген сұхбатында мадридтік «Атлетико» клубындағы тағылымдамасы туралы айтып берді.

«Мадридке баратынымды естігенде қатты қуандым. Достарым, туыстарым хабарласып, бәрі осы айтулы оқиғамен құттықтады. «Атлетико» – Испаниядағы ең мықты клубтардың бірі, Еуропада да, ел ішінде де көптеген жүлделері бар алпауыт ұжым. Мұнда бүкіл әлем танитын жоғары деңгейлі футболшылар ойнайды.

Өзіме келер болсам, жаттығуларда барымды салуға тырысып жүрмін. Алдымен «Шахтермен» бірге оқу-жаттығу жиынын өттім, содан кейін Мадридке ұшып келдім. Мені өте жақсы қарсы алды, қазір резиденцияда тұрып жатырмын – мұнда барлық қажетті жағдай жасалған. «Атлетикодағы» тағылымдама маған эмоциялық тұрғыдан да, кәсіби тұрғыдан да көп пайдасын тигізетініне сенімдімін. Осында мықты футболшылармен бірге жаттығуға мүмкіндік берген клубқа алғыс айтқым келеді», – деді қарағандылық ойыншы.

Макридов «Атлетико Мадрид» жүйесінде бір апта болады. Бастапқыда 19 жастағы футболшы өткен жылы QJ League All-Star құрамасына қарсы ойнауға келген және УЕФА Жасөспірімдер лигасында өнер көрсететін Atletico Juvenil A (U19) командасымен жаттығады деп жоспарланған.

Алайда алғашқы жаттығулардан кейін мадридтік клубтың бапкерлер штабы Макридовты жастар құрамына – Atletico Madrid C командасына қосу туралы шешім қабылдады.