Демченко Қазақстан ұлттық құрамасын жаттықтыра ма? «Жеңістің» экс-бапкері өз жауабын айтты

Елордалық «Жеңістің» бұрынғы бас бапкері Андрей Демченко спорт журналисі Ермұхамед Мәуленге берген сұхбатында Қазақстан ұлттық құрамасындағы қазіргі дағдарыс туралы пікір білдіріп, бас команданың тізгінін ұстауға дайын ба деген сұраққа жауап берді, деп хабарлайды ASnews.kz.

– Қазақстан ұлттық құрамасының соңғы матчтарын қадағалаған боларсыз. Біз Молдовадан жеңіліп, Фарер аралдарымен тең түстік. Бұл қанағаттанарлықсыз нәтиже ретінде бағаланып, бапкер ауысуы мүмкін екені айтылуда. Сіз Қазақстан құрамасын жаттықтыруға дайынсыз ба?

– Былай деп айтайын, ұлттық құрама мен клубтағы жұмыс – екі бөлек жүйе, бұл сөзсіз. Сондықтан бұған өте салмақты қарап, егжей-тегжейлі зерделеу керек. Қазақстан құрамасына келер болсақ, әрине, жанкүйер әрі маман ретінде соңғы нәтижелер мені аса қуантып тұрған жоқ. Нәтиже сәл де болса жақсырақ болғанын қалар едім. Қазақтар бұдан да жоғары жетістіктерге лайық. Керемет футбошылар, алдарына мақсат қойып, оны орындай алатын жігіттер бар. Олардың қазіргі тұрған орны – өздеріне лайықты орын емес. Қазақстан құрамасы бұдан әлдеқайда жоғары әрі жақсырақ болуы тиіс.

– «Жеңісте» бірге жұмыс істеген футболшыларды бақылап отырасыз ба?

– Әрине, мен өзім жұмыс істеген барлық футболшылармен байланыста болуға тырысамын. Нөмірлер, хабарламалар, чаттар бар. Мен Әзербайжан, Қазақстан, Грузияда жұмыс істедім және қазір Қазақстан футболы туралы толық ақпаратқа иемін. Бірге жұмыс істеген барлық жігіттердің мансабын қадағалап отырамын. «Қайсарға» ауысқан Сағи Советті, «Қызылжарға» барған Аслан Әділді, «Астананың» қатарына қосылған Дінмұхаммед Қараманды, сондай-ақ «Каспийде» ойнайтын Дінмұхаммед Жомартты бақылап жүрмін.

Еске салайық, Андрей Демченко 2025 жылдың екінші жартысында астаналық «Жеңісті» жаттықтырған болатын. Қазіргі уақытта украиналық маман биылғы жылдың қыркүйек айында грузиялық «Иберия 1999» клубынан кеткеннен кейін еркін агент мәртебесінде жүр. Украиналық бапкер тбилисилік клубты Конференция лигасының жалпы кезеңіне алып шыққан еді.

«Алдына үлкен мақсат қоятын команданы қалаймыз»: «Жеңістің» бұрынғы бапкері Демченко ҚПЛ-ға оралуы мүмкін екенін растады