Ұлттық құрамадағы орнын жоғалтты: «Тобыл» жартылай қорғаушысы клубын ауыстыруы мүмкін

Қостанайлық «Тобылдың» жартылай қорғаушысы Дәурен Жұмат алдағы қысқы үзілісте командадан кетуі әбден мүмкін, деп хабарлайды ASnews.kz Olimpbet Arena порталына сілтеме жасап.

Дереккөздің мәліметінше, 27 жастағы вингерге Қазақстан премьер-лигасының бірнеше клубы үміткер болып отыр. Футболшыны өз қатарына қосуға басты кандидаттар ретінде көкшетаулық «Оқжетпес» пен петропавлдық «Қызылжар» аталуда.

Жамбыл футболының түлегі Қостанайға 2026 жылдың басында дәл осы «Оқжетпестен» еркін агент құқығында ауысқан болатын. Алайда ол негізгі құрамда тұрақтай алмады: биылғы маусымда Жұмат барлық турнирлерде 21 матчқа қатысып (алаңда небәрі 827 минут өткізген), бір гол және екі нәтижелі паспен көзге түсті. Ойын практикасының жетіспеушілігінен жартылай қорғаушы Қазақстан ұлттық құрамасындағы орнын жоғалтып алды. Ол бас команда сапында былтыр дебют жасап, төрт кездесу өткізіп үлгерген еді.

Қоса кетейік, вингердің баруы мүмкін жаңа командалары чемпионатта түрлі мақсаттарды көздеп отыр. 29-тур қарсаңында «Оқжетпес» бесінші орында (45 ұпай) келеді және еурокубок аймағына таласуда. Ал «Қызылжар» 11-орынға (27 ұпай) тұрақтап, ҚПЛ-да қалу үшін күресуде. «Тобылдың» өзі қазіргі уақытта 37 ұпаймен жетінші сатыда орналасқан.

«Тобыл» қазақстандық қақпашымен келісімшартты ұзартпақ