«Астана» ойыншыларына қарыздар төленбеді, «Ордабасыға» қарсы матчқа баруы белгісіз

Елордалық «Астананың» футболшылары белгіленген мерзімге дейін уәде етілген қарыздарын ала алмады. Осыған байланысты команда ҚПЛ-дің 26-туры аясында шымкенттік «Ордабасыға» қарсы өтетін сырт алаңдағы матчқа бойкот жариялауы мүмкін, деп хабарлайды ASnews.kz.

Бұған дейін клуб құрылтайшысы («Sport Qory» қоры) 7 қыркүйекке дейін бірнеше ай бойы жиналып қалған жалақы қарызын өтемесе, ойыншылар жаттығулар мен ойындарға қатысудан бас тартуға дайын екендігі хабарланған болатын.

6 қыркүйек күні «Елімайды» (4:0) жеңгеннен кейін астаналықтардың бас бапкері Григорий Бабаян өзара келісімдер бар екенін мәлімдеген еді:

«Бәріміз ертеңгі күнді күтіп жүрміз. Мен сіздерге ештеңе айта алмаймын. Ертең бәрі шешіледі».

Алайда 8 қыркүйектегі жағдай бойынша команда алдындағы қаржылық міндеттемелер орындалған жоқ – ойыншылардың есепшотына ақша түспеді. Қазіргі уақытта «Астананың» Шымкентке барар-бармасы белгісіз.

26-турдың орталық матчы саналатын «Ордабасы» мен «Астана» арасындағы кездесу 12 қыркүйекке (19:00) жоспарланған.

Еске сала кетейік, шымкенттіктер жарыс кестесінде көш бастап тұр (24 матч, 55 ұпай), ал елордалық клуб екінші орындағы «Қайраттан» (54 ұпай) қалып, үшінші орынға жайғасқан (23 матч, 45 ұпай).

Жалақы мен сыйақы қарыз: «Алтай» ойыншыларымен толық есептеспеген

«Каспийдің» экс-легионері жалақы қарызына байланысты ФИФА-ға шағым түсіргені туралы айтты