«Төрешілік тақырыбын тағы қозғаймыз»: Ферапонтов «Тобылдан» жеңілгені және Салайдиннің құрамаға шақырылмауы туралы

«Қайсардың» бас бапкері Андрей Ферапонтов ASnews.kz басылымына берген сұхбатында «Тобылдан» ұтылғаннан кейінгі (2:3) өзекті сұрақтарға жауап берді.

«Тек алғашқы допты ғана емес, қайтқан допты да жеңіп алу өте маңызды. Бірінші таймда біз бұл жағынан қате әрекет еттік. Қарсылас сапында Марочкин, Ндиае және ұзын пастарға жақсы ілігетін, әрі мобильді Милованович сияқты бойшаң футболшылар болғанда, қарсы тұру қиын.

Жалпы алғанда, футболшыларым азды-көпті тапсырманы орындады. Букорац әуеде алдымен позицияны иеленіп, допқа ойнаса да сары қағаз алды. Ол келесі матчтқа қатыса алмайды, сондықтан төрешілік тақырыбын қайта қозғауымызға болады. Қателіктер болды, бірақ жұмыс істейміз. Жігіттерге айтар өкпем жоқ – олар барын салып, жанашырлықпен өнер көрсетті», – деді 51 жастағы маман.

Нұрымжан Салайдиннің ұлттық құрамаға шақырылуы туралы:

«Салайдин бізді бүгін де талай құтқарған сенімді қақпашы. 90-минуттан кейін тіпті бұрыштама добына да барды, онда біз асығыстық жасап, оған тиісті позицияны иеленуге мүмкіндік бермедік.

Егер Салайдин осылай ойнауын жалғастырса, ұлттық құрамадан шақырту да алыс емес. Кем дегенде кеңейтілген тізімге енуі тиіс. Бас бапкердің (Джон ван ’т Схиптің) барлық үміткерлерді бақылайтын көмекшілері көп. Мен мұны оған шын жүректен тілеймін. Бізде Нұрымжанды дамытып, шеберлігін арттырып жатқан білікті қақпашылар бапкері бар».

Бастапқы құрамдағы алты қорғаушы туралы:

«Біз тактикалық тұрғыдан икемдіміз: екі орталық қорғаушымен де, үш қорғаушымен де ойнай аламыз. «Тобылдың» қалай ойнайтынын білгендіктен, схеманы өзгертуге тырыстық. Оларға қиындық тудырған сәттер болды, кейін шабуылдаушы схемаға көштік. Есепті теңестіре алдық, бірақ пенальтиден доп жіберіп алдық», – деп қосты ол.

ҚПЛ-дың кейінге қалдырылған 21-турының матчында «Қайсар» өз алаңында «Тобылға» 2:3 есебімен жол берді. Жеңіс голын сербиялық шабуылшы Урош Милованович соқты.

Бұл – Андрей Ферапонтов шәкірттерінің ағымдағы маусымдағы сегізінші жеңілісі. «Қайсар» турнир кестесінде 13-орында келе жатқанымен, Қазақстан кубогындағы күресті жалғастыруда. Қызылордалықтар финалда «Ордабасымен» кездеседі.