Мәскеулік «Спартактың» бұрынғы футболшылары Қостанайға келді

Бейресми ақпаратқа сүйенсек, белгілі Беларусь бапкері әрі бұрынғы футболшы Мирослав Ромащенко, сондай-ақ Литва құрамасының экс-қақпашысы Гинтарас Стауче Қостанайға ұшып келді, деп хабарлайды ASnews.kz.

Әзірге олардың Қазақстанға қандай мақсатпен келгені белгісіз. Дегенмен бұған дейін БАҚ-та «Тобыл» клубының бас бапкері Нұрбол Жұмасқалиев қызметінен кетуі мүмкін деген ақпарат тараған еді. Сондай-ақ алдағы күндері Қостанай облысының әкімі Құмар Ақсақалов командамен кездеседі деп жоспарлануда.

Мирослав Ромащенконың соңғы жұмыс орны – «Урал» клубы. Оған дейін ол ұзақ жылдар бойы Станислав Черчесовтың көмекшісі ретінде «Ахмат», «Амкар», «Легия», «Ференцварош» клубтарында және Ресей құрамасында еңбек етті. Ал Гинтарас Стауче аталған командаларда қақпашылар бапкері болды, сондай-ақ Қазақстан құрамасының бапкерлік штабында да жұмыс істеген.