Нұрбол Жұмасқалиев отставкаға кету туралы ойынан айнып қалды

«Тобылдың» бас бапкері Нұрбол Жұмасқалиев қызметінен кету туралы шешімінен бас тартты, деп хабарлайды ASnews.kz.

44 жастағы маман Қазақстан Премьер-лигасының жаңа маусымын сәтсіз бастағаннан кейін (үш турда бір ғана ұпай) қызметінен кетуге ниет білдірген болатын.

Клуб басшылығы да Жұмасқалиевтің отставкаға кетуіне қарсы болмаған. Алайда бұл ақпарат БАҚ беттерінде жарияланып, жанкүйерлер тарапынан наразылық туындаған соң, облыс басшылығы бас бапкермен арнайы кездесу өткізді. Әңгіме нәтижелі өтіп, Жұмасқалиев алдағы турларда жағдайды түзетуге бел буды.

Бұған дейін «Тобыл» «Ақтөбеден» кеткен болгариялық Николай Костовпен және осы маусым басталардан бір апта бұрын «Атыраудан» кеткен беларусь маманы Виталий Жуковскиймен келіссөз жүргізуге дайын болғаны хабарланған еді.

Нұрбол Жұмасқалиев Қазақстан футболы тарихындағы ең үздік ойыншылардың бірі саналады. Ол мансабының басым бөлігін «Тобылда» өткізіп, клубпен бірге ел чемпионы атанды, Қазақстан Кубогы мен Интертото Кубогын жеңіп алған.