Ресейлік сарапшы – Нани мен Пьяничтің «Ақтөбеге» ауысуы жайлы: арзан хайп емес, мол тәжірибе

Ресейлік спорт сарапшысы және журналист Микеле Антонов ASnews.kz сайтына берген сұхбатында «Ақтөбенің» трансферлік науқанына қатысты пікір білдірді.

Бұған дейін БАҚ-та қазақстандық клубтың Миралем Пьянич пен Луиш Наниге қызығушылық танытып отырғаны жазылған еді.

«Меніңше, бұл жай ғана арзан хайп емес. Бұл – клубты тек ел ішінде ғана емес, Еуропада және бүкіл әлемде танытуға, сол арқылы жаңа жанкүйерлер аудиториясын тартуға жасалған қадам. Олар туралы көп айтылатын болады. Медиалық тұрғыдан алғанда – бұл өте дұрыс шешім», – деді сарапшы.

Маман «қызыл-ақтардың» бұл әрекетін алматылық клубтың медиалық белсенділігімен салыстырып, Чемпиондар лигасы аясындағы «Реалға» қарсы жуырдағы матчты еске алды.

«Көбісі «Ақтөбе» екінші «Қайрат» болғысы келеді дейді. Ресейде «Қайрат» туралы олардың «Реалмен» ойнағанынан кейін ғана жиі айта бастады. Бұл бір күннің ғана емес, айдың басты тақырыбына айналды.

Жалпы алғанда, бұл жағдай Пьяничтің ЦСКА-ға ауысуына ұқсас. Бұл тек медиалық күшею ғана емес, сонымен қатар алаңдағы тәжірибелі тұлға болды. «Ақтөбеде» де солай болатын сияқты», – деп қорытындылады Антонов.

Еске салайық, Алматыға келіп үлгерген 39 жастағы Луиш Нани жақын арада медициналық тексерістен өту үшін Ақтөбеге аттанады. Еуро-2016 және Чемпиондар лигасының жеңімпазы, төрт дүркін АПЛ чемпионы атанған португалиялық жұлдызбен қатар, клуб «Ювентус» пен «Барселона» сапында көптеген трофейлер ұтып, А сериясының төрт дүркін чемпионы және Чемпиондар лигасының үздік құрамына енген әйгілі Миралем Пьяничті де қатарға қосуды көздеп отыр.