«Футбол – ақша туралы емес, алаңдағы 90 минут туралы»: Гуаль «Панатинаикосқа» қарсы матч жайлы

Алматылық «Қайраттың» испаниялық шабуылшысы Марк Гуаль матч алдындағы баспасөз мәслихатында жаңартылған УЕФА Конференция лигасының жалпы кезеңінің екінші туры аясындағы грекиялық «Панатинаикосқа» қарсы ойыннан күтетін үмітімен бөлісті, деп хабарлайды ASnews.kz.

Қарсылас және турнир деңгейі туралы

«Мықты командаларға қарсы ойнауға әрқашан ерекше дайындаласың деп ойлаймын. Жеке өзім бізге испаниялық клуб түседі деп үміттендім. Бірақ бізде тамаша жеребе, Еуропаның үздік командаларына қарсы ойнаймыз. «Панатинаикос» – шынымен жақсы команда, мәртебесі биік, титулдары көп. Бұл өте ауыр ойын болады деп ойлаймын. Біз барынша жинақы болып, ең жақсы футболымызды көрсетуге тырысуымыз керек, ал одан не шығатынын көре жатармыз. Футбол – ақша мен бюджеттер туралы емес, бұл алаңдағы 90 минут. Бүгін жеңесің, ертең жеңілесің. Бірақ біз өз стадионымызда қарсыластың өмірін қиындату үшін қолдан келгеннің бәрін жасаймыз.

Әрине, мен үшін Де Врей сияқты мықты футболшыларға қарсы ойнау – ең керемет нәрсе. Жақсы командалар мен мықты ойыншыларға қарсы ойнап жатқанымыз – дұрыс жолда екенімізді білдіреді. Әрбір матчымыз осындай мықты қарсыластарға қарсы өтеді деп үміттенемін. Дәл осылай біз үйреніп, футболдан ләззат аламыз».

Чемпионаттағы мүмкіндіктер

«Чемпионатта бізде әлі де мүмкіндіктер бар, осы қарқынмен жалғастырамыз. Конференция лигасында әрбір ойын қиын. Мықты командалар, мықты ойыншылар. Біз алда не болатыны туралы ойланбауымыз керек. Матчтан матчқа алға жылжимыз. Нәтижесінде қайда жететінімізді және қандай орында болатынымызды көреміз. Біз алдын ала болжам жасамаймыз.

Ал лигадағы голдарыма келер болсақ... Мен өз мүмкіндіктерімді білемін, жыл сайын гол соғатынымды білемін. Мен жай ғана өз жұмысымды істеп жатырмын. Бұл тек еңбек, бүкіл мансабым бойы қалай жұмыс істеп келе жатқанымның көрінісі. Егер алаңда дұрыс әрекеттер жасасаң, голдар да, ассисттер де келеді. Мұның бәрі өз жұмысымды дұрыс атқаруымның нәтижесі, бәрі өздігінен келеді. Басқа нәрсе күттім деп айта алмаймын».

Жанкүйерлер қолдауы мен отбасы туралы

«Әрине, ертең стадион толы болады деп үміттенемін. Жанкүйерлер қаншалықты көп болса, біз үшін соншалықты жақсы. Бірақ бұл менің бас қатыратын мәселем емес. Мен алаңда не істей алатыным туралы ойлануым керек. Трибунада 100 адам болсын немесе 10 000 адам болсын, мен өз жұмысымды атқарамын. Соңғы матчтарда көрген шығарсыздар: гол соққанда оны әйеліме арнап, тойлаймын. Ол осында, менің қасымда...» – деп қорытындылады шабуылшы.

УЕФА Конференция лигасының жалпы кезеңінің екінші туры аясындағы «Қайрат» пен «Панатинаикос» арасындағы матч бейсенбі, 22 қазанда Алматыдағы Орталық стадионда өтеді. Кездесу Қазақстан уақытымен 19:30-да басталады.

Еске салайық, еурокуботың бірінші турында алматылық клуб сырт алаңда латвиялық «Ригамен» тең түссе (1:1), ал грекиялық ұжым өз алаңында босниялық «Борацты» 2:1 есебімен жеңген болатын.