«Қайрат» қорғаушысы «Брюггеден» жеңілу себебін түсіндірді: қазір деңгейіміз осындай болып тұр

Алматылық «Қайраттың» қорғаушысы Еркін Тапалов ASnews.kz сайтына берген сұхбатында Чемпиондар лигасында бельгиялық «Брюггемен» болған матчқа (1:4) қатысты пікір білдірді.

«Қазір бізде ойын ырғағы жоқ. Чемпионаттың аяқталғанына екі айдан астам уақыт өтті. Қазіргі деңгейіміздің осындай екенін мойындау керек», – деді Тапалов.

Футболшы матч күз айларында өткенде мүлдем басқаша өрбуі мүмкін екенін де атап өтті.

«Иә, егер бұл ойын қазан немесе қараша айларында өткенде, мүлдем басқаша болар еді. Өз стадионымыз, өз жанкүйерлеріміз, ең бастысы – тонуста болатын едік.

Қазір жұмысымызды жалғастырып, «Арсеналмен» болатын матчқа дайындаламыз. Иә, бұл кездесу ештеңе шешпейді, бірақ біз жақсы ойын көрсетуге тиіспіз. Уақыт бар, Лондонда болатын ойынға тыңғылықты дайындаламыз, – деп қосты ол.

«Қайрат» «Брюггеден» 1:4 есебімен жеңілді. Ал Чемпиондар лигасының жалпы кезеңіндегі соңғы матчты алматылықтар 28 қаңтарда Лондонда «Арсеналға» қарсы өткізеді.