«Команданың үздігі»: Burnley Express сарапшысы – Дастан Сәтпаевтың Англиядағы феномені туралы

Англиялық беделді Burnley Express басылымының тілшісі Мэтт Скрафтон ASnews.kz тілшісі Ерғанат Қабдұлқаққа берген сұхбатында «Бернлидің» 18 жастағы қазақстандық шабуылшысы Дастан Сәтпаевтың алғашқы матчтарынан алған әсерімен бөлісті, сондай-ақ оның Англиядағы бейімделуі мен айналасындағы медиа-дүрлігісті бағалады.

Сәтпаевтың дебюті мен ойыны туралы:

«Дастан сәрсенбі күні кешке Лига кубогінің матчында негізгі құрамда алаңға шықты. Меніңше, «Бернли» жанкүйерлерінің басым бөлігі оның ойынына таңдай қақты деп айтуға толық негіз бар. Бұл оны алғашқы минуттардан көруге мүмкіндік берген алғашқы нақты ойын болды. Мен өзім сөйлескен және желіде көрген жанкүйерлердің сөзіне сүйенсек, Дастанды бәрі де сол кездесуде командадағы ең үздік ойыншы деп атады.

Бұл – үміт күттіретін бастама! Ол шабуылға ұмтылатын және допты алға жылжытуға бағытталған футболшы болып көрінеді. Сонымен қатар Дастан «Бернлидің» рухына өте жақсы келеді: ол ерекше еңбекқор, терең артқа қайтып, допқа талас пен тартыстарға түседі. Ал алаңда аянбай еңбек ету – Шон Дайч заманынан бері клубымыздың тарихи іргетасы болып табылады. Осы қарқыннан таймайды деп үміттенемін».

Чемпионшипке бейімделу туралы кеңес

«Ол келісімшартқа отырғанда жанкүйерлерде «жасы тым жас емес пе, «Бернлиге» қазір көбірек тәжірибе керек» деген күмән болған еді. Бірақ менің Дастанға берер жалғыз кеңесім – кубоктық матчта істегенін жалғастыру: қолыңнан келгенше барыңды салып еңбек ету, прессинг жасау және допты тартып алу. Оның шеберлігі жоғары екені көрініп-ақ тұр – шеберлігі жоғары болмаса, «Челси» жүйесіне өтпес еді. Жасы кедергі болады деп ойламаймын. Егер алаңда аянбай тер төгуді жалғастырса, жанкүйерлер бұны тез бағалайды, ал оның шеберлігі нәтиже сыйлайды».

Әлеуметтік желідегі дүрлігіс пен Қазақстаннан келген қызығушылық

«Мен клубтың ресми ресурстарының статистикасын көрдім: олар Instagram-да 100 мыңға жуық жаңа жазылушыға көбейді! Бұл ақылға сыймайтын, өте керемет нәрсе. Әрине, «Челси» брендінің әсері бар екені түсінікті, бірақ ең бастысы – Қазақстанда Дастанды қатты мақтан тұтады және оның әрбір қадамын бақылағысы келеді. Қазақстандық жанкүйерлер біздің матчтарды әрі қарай да тамашалап, Дастанның да, «Бернлидің» де ойынына тәнті болады деп үміттенемін».

ЧЛ мен ұлттық құрамадағы тәжірибесі

«Оның профилі мен бұрынғы көрсеткіштерін зерттегенімде, Қазақстан ұлттық құрамасы сапында өткізген матчтарының санына және Чемпиондар лигасындағы өнеріне шынымен таңғалдым. Иә, бәрі оның жастығын және тәжірибесінің аздығын айтады, бірақ артыңда мұндай жарыстар бар кезде – бұл үлкен плюс. Чемпионшип – өте ауыр турнир, мұнда бір аптада үш матчтан ойнауға тура келеді. Дастан жарақаттан аман болса, «Бернлидің» нәтижелеріне орасан зор ықпал ете алады», – деп қорытындылады Скрафтон.

Дастан Сәтпаев «Бернли» сапына лондондық «Челсиден» жалға алу құқығымен ауысты. Чемпионшиптегі дебюті екінші турда «Вест Бромвичке» қарсы матчта (1:3) өтті, ол екінші таймда алаңға шықты.

Қазақстандық шабуылшы алғаш рет негізгі құрамда «Брэдфорд Ситиге» қарсы кубоктық кездесуде (0:0, пен. 2:4) алаңға шығып, ойынның басым бөлігін өткізді әрі қапталдағы белсенділігімен көзге түсті.

Үшінші турда «Норвичке» қарсы ойында (1:4) Сәтбаев толық 90 минут өнер көрсетті. Flashscore сервисінен 7.5 балл алған ол үш соққы жасап, төрт сәтті алдап өту орындап және үш шешуші пас беріп, «Бернли» сапындағы ең үздік ойыншы атанды.

Айта кетейік, Чемпионшиптің төртінші туры аясында Ники Хайеннің командасы 2 қыркүйектен 3 қыркүйекке қараған түні өз алаңында «Мидлсброға» қарсы ойнайды.

Сәтпаевқа қараңдар: «Бернли» бапкері ойыншылардан қазақстандық шабуылшыдан үлгі алуды талап етті