«Қақпашы қызуы көтеріліп ойнады»: Чурчич «Тобыл», Челядник және «Қызылжардағы» жарақаттар туралы

«Қызылжардың» бас бапкері Милич Чурчич «Тобылдан» жеңілгеннен кейін (0:2) командадағы өзекті мәселелерді тізіп берді, деп хабарлайды ASnews.kz.

Ромащенконың тактикасы таңғалдырды ма?

«Тобылдың» шебі біз үшін күтпеген сый болған жоқ. Өйткені қарсыластың ойындарын талдап, осындай бір дүниені күткен едік. Олардың сапында Ндиайе, Сенхаджи және Кавнич бар екенін әрдайым есте сақтадық, сондықтан белгілі бір сәтте үш орталық қорғаушымен ойнау жүйесіне көшуі мүмкін екенін білдік».

Гомистің жарақаты мен екі ойыншының матчқа қатыспауы

«Оноре осыдан 20 күн бұрын «Ақтөбеге» қарсы матчта (0:0) жарақат алып қалған еді. Өкінішке қарай, ол әлі де бөлек жаттығып жүр. Әділ – шабуылда бізге үлкен көмек беретін ойыншы: қарсыласқа жиі қысым жасап, барын салады. Жылдамдық қажет болған бұл алаңда оның орны ерекше білінді.

Галабов – сары қағаздардың көптігінен бұл кездесуден тыс қалған тағы бір тұрақты ойыншымыз. Олардың бәрі қатарда болса жақсы еді, бірақ бұл футбол – жағдайға бейімделу керек. Біз ақталу іздемейміз».

Қосалқы құрамнан шыққан Петров сенімді ақтады ма?

«Қақпашылар туралы жиі айта бермеймін, өйткені бізде арнайы бапкер бар. Мен командадағы барлық қақпашыларға ризамын, олар жақсы жұмыс істеп жатыр. Мүмкін, алаңға шығамын деп күтпегендіктен, Петровқа ойын ырғағына кірісіп кету сәл қиынырақ болған шығар, бірақ жалпы алғанда ол – ысылған футболшы.

Ал Челядник халықаралық үзілістен кейін ауырып қалды. Диманың қызуы көтеріліп тұрса да, ұжымға көмектесті. Оның алған жарақаты қаншалықты ауыр екенін көреміз. Алаң төсенішінде де бір шикілік бар сияқты», – деді 45 жастағы сербиялық маман.

ҚПЛ-дың 13-туры аясында өткен бұл матчта «Тобыл» Урош Милованович пен Александр Зуевтің голдарының арқасында «Қызылжарды» жеңді. Кездесудің 49-минутында қонақтардың қақпашысы Дмитрий Челядник жарақат алып, оның орнына 26 жастағы Вадим Петров шықты.

Осы жеңілістен кейін Милич Чурчич шәкірттері турнирлік кестеде 10-шы сатыға сырғыды.