«Отбасыларыңызды ойлаңыздар»: Шушеначевтің агенті «Ақтөбе» шабуылшысының жағдайы туралы айтты

Артур Шушеначев – 2026 жылғы ҚПЛ-дың ең көп талқыланатын футболшыларының бірі. Маусымда жеті нәтижелі әрекет жасағанына қарамастан, «Ақтөбе» шабуылшысы жанкүйерлер тарапынан ауыр сынға ұшырады. ASnews.kz сайтына берген сұхбатында қазақстандық ойыншының агенті Сергей Цырин оның қазіргі бабы мен жағдайы туралы айтып берді.

«Шектен шықпаңыздар»

«Жанкүйерлер – футболдың маңызды бөлігі, әсіресе «Ақтөбе» туралы айтатын болсақ. Егер сын айтылса, демек негіз бар. Бірақ шектен шықпау керек. Өткен маусымда Артур әр матчта дерлік гол соғып жүргенде де көңілі толмайтындар табылатын. «Ордабасымен» ойында (2:2) дубль жасаса да, бәрібір ренжіп жатты.

Жағымсыз сөз жазатын әрбір адам мұны футболшының ата-анасы мен жақындары оқуы мүмкін екенін ойлауы тиіс. Мен Қазақстанды үлкенді сыйлайтын, отбасылық құндылықтар мен діни көзқарастар маңызды рөл атқаратын ел ретінде білемін», – деді Цырин.

Хейт біреуге тиімді ме?

«Жалған аккаунттар жағымсыз пікір қалдырғанда, бұлардың көбіне бәстен ұтылғандар екенін түсінемін. Бірақ кейбір танымал адамдардың көше жексұрындары сияқты әрекет етіп, мәдениет пен өзара құрметті ұмытып, ауыр сөздер айтатынын көру таңғаларлық жағдай. Оларды түсіне алмаймын».

Отбасына әсері

«Көп адам біле бермейді, бірақ Артурдың үлкен жанұясы бар. Ол үйіндегі алты баланың бірі, ал өткен жылы өзі де әке атанып, ұл тәрбиелеп отыр. Ол барлық жақындарына көмектеседі, сондықтан «Ақтөбе» жанкүйерлеріне айтарым: жаман сөз жазарда өз туғандарыңызды ойлаңыздар. Сіздер жазған мұндай сөздерді бауырларыңыз немесе қарындастарыңыз оқыса, қалай ауыр тиетінін көз алдарыңызға елестетіңіздерші.

Адам қалпымызды сақтап, бет-бейнемізді жоғалтпауымыз керек. Өздеріңіз тұрып жатқан тамаша елге тән ізгі қасиеттер мен құндылықтарды сақтаңыздар», – деді шабуылшының өкілі.

Шушеначев шынымен де «Шанхай Портқа» ауысуы мүмкін бе еді?

«Қытайлық команда туралы ақпарат мен үшін де тосынсый болды. Біз ол жаққа ауысу туралы ешқандай келіссөз жүргізген жоқпыз, есесіне Оңтүстік Кореяның өте маңызды клубымен сөйлескенбіз.

Қыста ұсыныстар көп түсті, бірақ кей жерде лига деңгейі, кей жерде жоба немесе қаржылық шарттар көңілден шықпады. Біз саналы түрде «Ақтөбені» таңдадық және бұған өкінбейміз».

Психологиялық жағдайы

«Артур әрқашан кәсіби ойыншы болған және солай болып қалады. Жаттығуда да, матчтарда да 100 пайызға жұмыс істейді. Статистикасы да жаман емес: бес гол соғып, екі нәтижелі пас берді. Тек «Ертіспен» ойындағы (1:0) жеңіс голын соққан сәтте алған жарақаты оны сәл ырғақтан шығарып алды.

Ауырсыну мен жарақаттың қайталану қаупіне қарамастан, ол бәрібір алаңға шығып жүр. Шын мәнінде, ол «Ақтөбенің» жалғыз шабуылшысы болып тұр – құрамда жарақат алғандар өте көп. Қазір Шушеначев кейбір көрермендер байқай бермейтін үлкен көлемдегі қара жұмысты атқаруда.

Жарақаттан кейін іс жүзінде ауысымсыз ойнау қиын, бірақ соған қарамастан маусымда 4,9 xG (күтілетін голдар) жиналды. Оның еншісінде екі жеңіс голы мен командаға әкелген алты ұпай бар. Бұл уақытша құлдырау екеніне күмәнім жоқ, алдағы уақытта Артур клубқа әлі көп пайда әкеледі», – деп толықтырды ол.

Өткен жылдың жазында «Қайраттың» 28 жасар түлегі Артур Шушеначев «Ақтөбемен» келісімшартқа отырған болатын. Барлық жарыстарда өткізген 27 матчта шабуылшы 12 гол соғып, төрт ассист жасады. Бұған дейін ол израильдік «Хапоэль» және ресейлік «Сочи» клубтарында өнер көрсеткен.