Депутаттардың ұлдары мен шенеуніктердің жиендері. Қазақ футболындағы «мажорлар»

Жоғары лауазымды шенеуніктердің балалары ҚПЛ матчтарында жеңіс голдарын соғып жүрсе, енді бірі бірнеше жылдық үзілістен кейін футболға қайта оралуда.

ASnews.kz ықпалды таныстары бар (немесе болған) қазақстандық клубтардың жас әрі қазіргі басшыларының тізімін ұсынады.

Айбек Тілеужан, 33 жаста

Бейресми мәліметтер бойынша, оның туысы Хаким Көшқалиев – Түркістан облысы футбол қауымдастығының президенті және аймақтық сыбайлас жемқорлыққа қарсы іс-қимыл ведомствосының бұрынғы басшысы. «Тұранға» келгенге дейін «Түркістан Арена» директоры қызметін атқарды. Футбол клубының директорлық креслосына 28 жасында отырды.

«Тұраннан» кейін «Ордабасыда» басшылық лауазымдарда болды. 2026 жылдың сәуірінде «Атыраудың» бас директоры болып тағайындалды.

Әлішер Апсалямов, 36 жаста

Әкесі Ерболат Апсалямовтың Мәжіліс депутаты мандаты мен қазақстандық Forbes тізіміндегі орны бар. Әлішердің өзі футбол әкімшілігіндегі мансабын ерте бастады: «Кардифф» пен босниялық «Сараевода», кейін «Қайратта» жұмыс істеп үлгерді. 32 жасында «Атырауды» бас менеджер мәртебесінде басқарды.

2025 жылдың ақпанында «Тобылға» спорттық директор лауазымына ауысты, сол жылдың қарашасында «Қызылжарда» бас менеджер лауазымына бекітілді. 2026 жылдың наурызында ресми түрде клубтың бас директоры болып тағайындалды.

Дидар Сыдықбек, 33 жаста

Бизнеске бейімділік әкесінен дарыған. 21 жасында ойыншы мансабын уақытша тоқтатып, компаниялардың бірінде басқарушылық лауазымға ие болды. Кейін жинаған капиталына өз футбол клубын құрды – бүгінде ол «SD Family» ретінде белгілі.

2025 жылдың наурызында «Атыраудың» бас менеджері болып тағайындалды. 2025 жылдың жазында қала кәсіпкерлеріне қаржылай қолдау көрсету туралы ашық үндеу тастады – ол кезде клуб ҚПЛ-да соңғы орында тұрған еді. 2025 жылдың желтоқсанында «Атыраудан» кетіп, «Таразды» басқарды.

Бақдаулет Қожабаев, 33 жаста

Бұл жағдайда футбол династиясы тікелей байқалады: Бақдаулеттің әкесі – Бағлан Ергешев, ҚФФ-ның бұрынғы вице-президенті және экс-ойыншы, әр жылдары Қазақстан кәсіпқой футбол лигасын басқарған және «Ордабасы», «Атырау», «Окжетпес», «Қайрат» және «Астана» клубтарында менеджерлік қызметтер атқарған. Бақдаулеттің өзі Қазақстан жастар құрамасында ойнап, «Ордабасы», «Ертіс» және «Қызылжар» сапында өнер көрсетті. «Оқжетпестің» спорттық директоры қызметін 28 жасында алды. Қазіргі уақытта – «Оңтүстік» академиясының директоры.

Алдаир Әділов, 23 жаста – «Жеңіс»

Оң жақ қорғаушы, 2024 жылдың ақпанынан бастап «Жеңіс» сапында өнер көрсетеді, келісімшартын 2026 жылдың соңына дейін ұзартты. Бұған дейін «Қызылжар», «Астана-Жастар», беларуссиялық «Энергетик-БГУ» және испаниялық «Марсет» клубтарында ойнаған. Transfermarkt бағасы – 10 мың еуро.

Әкесі – Санжар Әділов, 2024 жылдың қарашасынан бастап ҚР Ішкі істер министрінің орынбасары. Оған дейін Ішкі істер Министрлігі Тергеу департаментін басқарды.

Биылғы маусымда Алдаир Әділов «Жеңіс» сапында төрт матч өткізіп, бір гол соқты.

Марат Омаров, 37 жаста – ҚФФ президенті

Семей тумасы, 2024 жылдың желтоқсанында бірауыздан дерлік ҚФФ президенті болып сайланды – 36 дауыстың 34-і оған берілді. University of York және London School of Economics оқу орындарында білім алған. Сайлауға Алтай Дәумов (2 дауыс) пен Ербол Каиров (0 дауыс) та қатысты. Сонымен қатар ҚР Бәсекелестікті қорғау және дамыту агенттігінің төрағасы болып табылады. Бейресми мәліметтер бойынша, ҚФФ-дағы негізгі тағайындауларды оның жақын ортасындағы адамдар алуда – атап айтқанда, Омаровпен бірге Лондон экономика мектебінде оқыған стратегиялық офицер Арсен Ахат.

Бекжан Сафинов, 37 жаста – ҚФФ басқарушы директоры

2025 жылдың қаңтарында Қайсар Бекеновтің орнына ҚФФ басқарушы директоры болып тағайындалды. Оған дейін 2020 жылдан бастап Golf Club Astana басқарған. Экс-сенатор Қанатбек Сафиновтың ұлы – VI және VII шақырылымдағы (2019–2023) Сенат депутаты, Энергетика министрлігінің бұрынғы жауапты хатшысы, «ҚазМұнайГаздың» басқарушы директоры және «Самұрық-Қазына» басқарма мүшесі. Тағайындалғанға дейін футболда тәжірибесі болмаған. 2026 жылдың мамыр айындағы мәлімет бойынша, ҚФФ басқарушы директоры қызметін жалғастыруда.

Давид Лория, 44 жаста – ҚФФ вице-президенті

Қазақстан құрамасының экс-қақпашысы (46 матч), UEFA MIP бағдарламасының түлегі. 2025 жылдың сәуірінде ҚФФ бас хатшысы болып тағайындалды. 2026 жылдың наурызында қызметінен босатылды – оның отставкасы үшін атқарушы комитетегі 11 адамның алтауы дауыс берді. 2026 жылғы 20 наурызда ҚФФ вице-президенті болып тағайындалды – құрамалар департаменті мен бұқаралық футболды дамытуға жетекшілік етеді.

Әкесі – Григорий Лория, 2014 жылдан 2024 жылға дейін «Астананы», «Шахтерды», «Оқжетпесті» және Қызылжарды» басқарды. Басшылық қызметтен кеткеннен кейін Австралияға қоныс аударды. Осы уақытта Петропавлда клубтағы бюджет қаражатын жымқыру фактісі бойынша сот процесі өтіп жатты.