Мартин – «Атыраумен» болған матч туралы: ең бастысы – жеңілмедік

Шымкенттік «Ордабасы» клубының бас бапкері Андрей Мартин «Атырауға» қарсы өткен матч туралы пікір білдірді, деп хабарлайды ASnews.kz.

«Бұл ойынға көп эмоция жұмсадық. Біз үшін оңай өткен жоқ. «Атыраудың» бұған дейінгі үш ойынды қатарынан тең аяқтағанын білдік. Бұл мінезді команда. Қорғанысты жақсы ұстайды әрі қауіпті сәттер де жасай алады. Мұндай тығыз қорғанысты бұзу өте қиын. Біз гол соғатын көптеген мүмкіндік жасадық, бірақ сәл сәттілік жетіспеді.

Жігіттердің мінезіне ризамын. Ең бастысы – жеңілген жоқпыз. Бірақ өз алаңымызда жеңіске жете алмағанымыз өкінішті.

Алдымызда әлі көп жұмыс күтіп тұр. Кеше ғана командаға екі жаңа ойыншы қосылды. Олардың толық бейімделуі үшін уақыт керек. Құдай қаласа, бәрі жақсы болады. Халықаралық үзіліс те команданың ойынына әсер етті. Ойыншыларға тағар кінәм жоқ. Бізге бір нәрсе жетіспеді. Мұны талдап, алдағы уақытта қайталамауға тырысамыз.

Гол соғу тек шеберлікке байланысты емес. Мұнда психология мен басқа да факторлар әсер етеді. Ең бастысы – біз мүмкіндіктер жасап жатырмыз. Егер ондай сәттер болмаса, гол да болмайды. Көп мүмкіндік жасап жүргеніміз қуантады.

Муроджон Халматовқа келсек, біз оған сенеміз. Ол – жақсы ойыншы. Иә, командада бәсекелестік жоғары. Бұл ойында оның жолы болмады, бірақ біз оны қолдаймыз. Алдағы матчтарда өзін жақсы қырынан көрсетеді», – деді Мартин.

Қазақстан Премьер-лигасының төртінші турындағы кездесу Шымкентте өтіп, тең нәтижемен аяқталды – 1:1. «Мұнайшылар» 20-минутта Константин Дорофеевтің арқасында есеп ашып, ойын соңына дейін алда келе жатқан. Алайда «Ордабасы» негізгі уақытқа қосылған минуттарда жеңілістен аман қалды: 90+11-минутта Эльхан Астанов пенальтиден гол соқты.