«Жеңістің» португалиялық экс-легионері – Нани туралы: барлық матчта ойнай алмайды

Өткен маусымда ҚПЛ-да өнер көрсеткен португалиялық жартылай қорғаушы Жуан Оливейра ASnews.kz сайтына берген сұхбатында өз отандасы Луиш Нанидің «Ақтөбеге» ауысуына қатысты пікір білдірді.

«Қазіргі кезде футболшылар өздерінің физикалық дайындығына көбірек мән береді. Егер ойыншы салауатты өмір салтын ұстанса, 40 жасқа дейін де жоғары деңгейде ойнай алады.

Әрине, Нани ұзақ уақыт бойы ресми матчтарға қатыспаған, бұл белгілі бір қиындық тудыруы мүмкін. Бірақ оның қазіргі формасын көрсеңіздер, өзіне жақсы қарайтыны байқалады. Ол «Манчестер Юнайтед» пен Португалия құрамасындағы Нани деңгейінде болмаса да, әлі де командаға пайдасын тигізе алады деп ойлаймын. Себебі шеберлік ешқайда жоғалмайды», – деді Оливейра.

Сондай-ақ Жуан жаттықтырушылар штабы тәжірибелі ойыншыны қалай пайдалануы мүмкін екенін де болжады.

«Ол барлық матчта толық ойнай алмауы мүмкін. Бірақ кейбір кездесулерде маңызды рөл атқарады. Тіпті аз уақыт алаңға шықса да, оның аты мен тәжірибесі «Ақтөбе» футболшыларының дамуына және менталитетті қалыптастыруға көмектеседі», – деп түйіндеді португалиялық футболшы.

Жуан Оливейра 2024 жылғы маусымда елордалық «Жеңіс» клубының намысын қорғады. Ол елордалық команда сапында 13 матч өткізді. Бұған дейін Португалия мен Польша клубтарында ойнаған.

Айта кетейік, «Ақтөбе» ҚПЛ тарихындағы ең мықты трансферлердің бірін жасап, 39 жастағы португалиялық футболшымен келісімшартқа отырды.

Луиш Нани «Манчестер Юнайтед» сапында төрт рет Англия Премьер-лигасының чемпионы атанып, 2008 жылы Чемпиондар лигасын жеңіп алды. Сондай-ақ ол Португалия құрамасымен 2016 жылғы Еуропа чемпионы атанған. Мансабында «Спортинг», «Валенсия», «Фенербахче», «Лацио» және МЛС клубтарында өнер көрсеткен.