«Жеңістің» экс-бапкері – клубтан кетуі жайлы: Давид Лориямен кездестім

Елордалық «Жеңіс» клубының бұрынғы бас бапкері Андрей Демченко ASnews.kz сайтына берген сұхбатында қазақстандық клубтан кету себептері жайлы айтып берді.

– «Жеңістің» соңғы ойыны 26 қазанда өтті. Ал 1 қарашаға елден ұшым кетуім тиіс болған. Біз Давид Григорьевич Лориямен кездестік (кейін Демченко қайта хабарласып, клубтың бас директоры Айдын Қожахметпен сөйлескенін айтты – авт. ескертпесі), клубтағы жағдайды талқыладық. Әңгіме мынадай форматта өтті: клубтың жаңа иесі әлі келмеген, құжаттық жұмыстар жүріп жатыр, бір құрылымнан екіншісіне өту процесі болған. Сол себепті біз байланыста болуға келістік. Кездесу қалыпты жағдайда өтті, сөйлестік, қоштастық. Кейін мен демалысқа кеттім, – деді бапкер.

– «Жеңістің» болашағы мен жаңа бапкердің тағайындалуы туралы не айтасыз?

– Мен тек жақсы, оң пікір айта аламын. Жаңа бапкер – менің әріптесім. Ол да мен секілді жаттықтырушы. Оған футбол клубында табыс тілеймін. «Жеңістің» мүмкіндігінше жоғары нәтижелерге жетуіне үлес қоссын деймін. Бұл – өмір. Кейде осылай, кейде басқаша болады. Шешім қабылданды, енді бәрін уақыт көрсетеді. Қабылданған шешімнің дұрыс-бұрыстығын уақыт өте келе бағалауға болады.

Қазақстаннан кеткеннен кейін Андрей Демченко Әзербайжанның «Араз-Нахчыван» клубының бас бапкері атанды. Украиналық маманның жетекшілігімен «Жеңіс» Қазақстан Премьер-лигасында алтыншы орынға тұрақтаған болатын.

Ал Давид Лория Қазақстан футбол федерациясында бас хатшы қызметін атқарады. Ол Sports24.kz сайтына берген сұхбатында елордалық клубтың жедел басқару ісінен шеттетілгенін мәлімдеген еді.