Эксперт — «Ақтөбе» – «Спарта» ойыны жайлы: пенальти болған жоқ

Қазақстандық футбол эксперті Рымбек Ізғали BorodAbata.kz сайтының тілшісіне Конференция лигасының екінші іріктеу кезеңіндегі «Ақтөбе» мен «Спарта Прага» арасындағы алғашқы кездесуге байланысты өз ойымен бөлісті. Бұл ойында алаң иелері чехиялық команданы 2:1 есебімен жеңіп, сенсация жасады.

Журналист осыдан 16 жыл бұрын орын алмаған кездесу жайлы да еске алды:

«Негізі дәл осы «Спарта» клубымен «Ақтөбе» 2008 жылы кездесуі керек болатын. Ол үшін біз алдымен Молдованың «Шериф» командасынан өтуіміз керек еді. Сол кезде «Жазда Прага қандай әдемі» деген баннер де дайындағанбыз. Бірақ оқиғаның қалай аяқталғанын бәріңіз білесіздер».

Матч барысын сараптай келе, Ізғали «Спарта» футболшыларының деңгейін жоғары бағалады:

«Футболшылардың шеберлігі бірден көзге ұрып тұрды. Бірінші таймның басында бірнеше рет гол соғатын мүмкіндік болды. Алайда «Ақтөбе» ойыншылары көп жағдайда допқа таласта үстем болды. Әсіресе алаң ортасында белсенділік байқалды. Орталық қорғаушы Бағдат Қайыров шабуылдарға жиі қосылып, қарсыластың қорғанысын қысымға алды. Оның бұл ойынына тіпті Левчук та оң баға берді».

Ізғали төрешінің де рөлін назардан тыс қалдырмады:

«Менің ойымша, «Ақтөбенің» бапкерлер штабы бас төрешіні мұқият зерттеген. Ойын басында ол әрбір фолға ысқырып отырды. Мұндай төрешіге дайын болған ақтөбеліктер жағдайға тез бейімделсе, қонақтар өздерінің агрессиялық ойын стилін өзгертуге мәжбүр болды. Өйткені олар қажетсіз ескерту алғысы келмеді. Әрине, пенальти болған жоқ. Дегенмен, тәжірибелі қорғаушы Анджелкович сол эпизодта үлкен қателік жіберді. Бұл – оның автоматты түрде жасаған әрекеті болды деуге болады».

Матч соңында эксперт «Ақтөбе» жанкүйерлеріне алғысын білдіріп, қарымта ойын туралы өз болжамын қоса кетті:

«Прагадағы матчтың алғашқы он бес минуты өте қиын болады. Дегенмен, кеше Оралханның голы «Ақтөбенің» қарсы шабуылда да қауіпті екенін дәлелдеді. Бұл – «Спарта» бапкерлері үшін үлкен ескерту. Қандай нәтиже тіркелсе де, өкпе жоқ. Алдыңғы кезеңде «Қайрат» қуантып еді, енді сол қуаныштың жалауын «Ақтөбе» алып жүр. Бұл – спорт. Бұл – футбол. Бұл – өмір!», — деді эксперт.

Қарымта матч келесі аптада Чехия астанасы – Прагада өтеді.